Vir Karin en Edward op hulle troudag
Oom Tolla het altyd gesê hy weet nie hoekom mense trou nie: ¨As jy wil moeilikheid hê, koop liewer vir jou ´n Alfa.¨
Socrates het gesê; ¨By all means marry, if you get a good wife, you´ll be happy. If you get a bad one, you´ll become a philosopher ... and that is a good thing for any man.¨
Nou wie gaan ons nou glo?
Gelukkig weet ons dat Karin ´n goeie vrou is met, om ´n sekere film aan te haal, ´n onkreukbare karakter. Ons weet ook dat sy meer soos ´n Mercedes-benz is as ´n Alfa. So ek glo oom Tolla sal Saterdag met goedkeuring op julle neerkyk.
Dis seker verskriklik om te sê en baie mense sal dit onomwonde ontken, maar mense wat trou vir regte-egte, ware liefde is uiters skaars. Party mense trou vir geld en ander uit vrees dat hulle alleen gaan doodgaan. Party mense vind nooit liefde nie. Ander vind liefde, maar dis eensydig. Dit wat julle vir mekaar voel en die feit dat julle mekaar gevind het is iets wat niemand van julle kan wegneem nie.
Ek is die laaste persoon wat kan raad gee oor die huwelik, maar ek wil nietemin julle op die volgende paar punte wys;
Edward:
Die dae toe selfone nie opgevang het nie, is verby. En jy kan die ding se battery in die kar laai. As Karin jou voicemail kry wanneer sy jou bel, het jy die foon afgesit – sy weet dit.
Sorg altyd dat jy meer aandag aan jou vrou as aan jou Land Rover spandeer, al is dit net so ´n bietjie.
Safari Centre se brosjures is vrylik beskikbaar. Karin kan binne ´n oogwink uitvind hoeveel meeste 4x4 bykomstighede regtig kos.
Clorets doen ook net soveel vir ´n rook-asem.
As jou tannie jou op die wang gesoen het, maak seker die lipstiffie is af. Daar´s nou maar een maal dinge in die lewe wat jy nie heeltemal kan weg verduidelik nie.
As jy Bullybeef en baked-beans op ou witbrood vir aandete kry, vra maar dadelik wat jy verkeerd gedoen het. Dit help nie om uit te stel nie.
Karin:
Dit is teen die reëls om ´n selfoon op die gholfbaan aan te sit. Onthou, sy gholf-tyd is jou Brooklyn-tyd.
As jy vir Edward móét saamsleep na een of ander mall toe, los hom in Cape Union Mart terwyl jy gaan rokke kyk. Die nuwe Donatella Versace handsak is vir hom net so oninteressant soos ´n Marthinus van Schalkwyk toespraak.
Geen 4x4 is ooit beter as die een wat jou man op enige stadium bestuur nie – klaar gepraat.
Die vroulike vorm is deel van die natuur. As Edward sy kop amper afdraai om na ´n aster se agterstewe te loer, is dit vir hom soos om na die blomme in Namakwaland te kyk. Niks meer nie.
Biltong is die manlike geslag se blomme. ´n Paar kilogram in ´n bruin papiersak maak ons net so nostalgies as wat driehonderd rooi rose julle maak.
Nee, jou boude lyk nie groot in enige rok nie, so moenie vra nie. Strikvrae is nie toelaatbaar in ´n huwelik nie.
Van my kant af baie geluk, ek wens julle al die vreugde en geluk in die wêreld toe. Mag elke dag aan julle iets nuuts bring, mag julle argumente uitgestryk word voor dit begin en mag die skarniere van die liefde nooit vir julle roes nie.
Onthou, dit wat julle het is ´n reuse geskenk van bo. Benut elke oomblik daarvan ten volle.
Die Wit Rus